Nachruf
|
|
Rudolf Schaub, geboren am
|
Mi Papi, unsere liebe Ruedi
Am 28. Mai 1945 isch dr Ruedi uff dWält cho. Är isch als 1. Kind vo dr Familie Schaub in Ettige gebore. Nochhär sin no 2 Schwöschtere cho, s`Vreni und s'Näschthöggli. s'Lotti. Si ganzi Jugend hett är in Ettige verbrocht.
Vor 40 Joor hett är denn s'Doris kennegleert und sich grad in si verliebt.
Uss däre grosse Liebi sin 2 Maitli entstände, s'Nicole und ich. Si Familie isch
si ganze Lebensinhalt gsi.
Mit sinnere liebe Frau und sine beide Kinder hett är villi schöni Schtunde und
Joore dörfe verbringe.Si ganzi Freizytt hett är sine Chinder und schpöter sine
4 Grosskinder gwidmet.
Är isch vo Schiggsalsschläg nitt verschont worde und so hett är vor guet 7 Joor
si liebi Tocher, s'Nicole verloore. Das isch für ihn e wahnsinnige Schmärz gsi
und är hett e schampar schweri Zytt duuregmacht. Dangg sinere positive
Läbensiischteltig und sinere Frau, Familie und Fründe hett är au das Schiggsal
gmaischeret. Är hett sich uffgrafft und hett mit dr Doris zämme witter
Schnitzelbängg gsunge, das isch ains vo sine grosse Freudeli gsi.
Für Ihn isch s'Gröschte gsi, wenn är mit sine Grosskinder in d'Summerferie hett chönne gho. Sogar au d' Ferie im letschte Summer hett är sich nitt näh loh und isch mittene in d'Türkei gflooge.
Är hett s'Läbe lang immer gschafft und isch sitt 41 Joor in dr Ciba aagschtellt gsi.
An jedem Fescht hänn mir uns alli an ihm gfreut. Är hett's schampar gnosse, wenn är mit dr Doris amene Fescht no hett chönne sini schöne Lieder singe.
Doch vor anderthalb Joor hett denn s'Schiggsal nomol zuegschlaage und är hett miesse si schlimmi Diagnose vom Gräbbs erfahre. Är hett au denn kämpft und gmaint, är schafft au das no. Leider isch es nitt so uusecho, wie mir uns das alli gwünscht hätte. Nach däre lange Litdenszytt hett är denn dörfe im Büsii vo sinere liebe Frau, sinere Tochter, Schwöschter dörfe ganz ruhig iischloofe.
Und so sinn mir jetz alli zämme cho, um vo mim liebe Papi und em liebe Ruedi Abschied z'näh.
Liebe Papi, ich wünsch Dir e gueti Reis und das de jetz nie meh muesch liide.
Mir hänn Di alli fescht gärn und trage Di während unserem ganze Läbe in unsere Härze. Villicht sehn mir uns irgendwann wider emol.
Sandra Egli-Schaub
Im Schifferhaus, trat er Ende 1982, als "Nichtschiffischer" dem Schifferverein bei. Er war ein gern gesehener und geselliger Gast bei unseren Vereinsanlässen. Im Namen der Vereinskameraden spreche ich den Angehörigen unser herzliches Beileid aus. Rudolf hinterlässt bei seiner Familie und seinen Freunden eine Lücke, die sich nicht mehr schliessen lässt. Wir werden unseren verstorbenen Kameraden in guter Erinnerung behalten.
In Gottes Namen, gute Fahrt
B. Isenschmid